ⵜⴰⴳⵯⵎⵔⵜ ⵙ ⵡⵓⵚⵚⴽⴰⵢ
ⵉⵍⴰ ⵡⵓⵚⵚⴽⴰⵢ ⵉⵊⵊ ⵏ ⵡⴰⵏⵙⴰ ⵉⵥⵍⵉⵏ ⴳ ⵡⴰⵎⵓⵏ ⴰⵎⵖⵔⴰⴱⵉ, ⵎⵉⵏⵣⵉ ⵉⵜⵜⵡⴰⵙⵙⵏ ⵙ ⵓⵙⵓⴼⵓ ⴷ ⵜⵉⵔⵔⵓⴳⵣⴰ ⴷ ⵜⵉⵎⵎⵓⵣⵖⴰ, ⴰⵔ ⴰⵙ ⵜⵜⵓⴼⴽⴰ ⵜⵖⴹⴼⵜ ⴳ ⵡⵓⵜⵛⵉ ⴷ ⵓⴷⵖⴰⵔ ⵏ ⵜⴳⵓⵏⵉ ⵏⵏⵙ, ⴰⵔ ⵜⵎⵖⵏⵏⴰⵏ ⵉⴳⵎⴰⵎⵏ ⵏ ⵜⴰⵡⵊⴰ ⵖⴼ ⵜⴰⵡⵉⵜ ⴷⵉⴳⵙ ⴷ ⵓⵃⵢⵢⵍ ⵏ ⵡⴰⴷⴷⴰⴷⵏ ⵏ ⵓⵙⵡⵓⵏⴼⵓ ⵏⵏⵙ. ⵉⴽⴽⴰ ⵜⵜ ⵏⵏ ⵢⵉⵍⵉ ⵏ ⵡⵓⵚⵚⴽⴰⵢ ⴳ ⴽⵔⴰ ⵏ ⵜⴳⵎⵎⵉ ⴷ ⵜⴰⵎⴰⵜⴰⵔⵜ ⵏ ⵜⴱⵖⵓⵔⵜ ⴷ ⵜⵉⵅⵅⵉⵜⵔⵜ. ⵖⵎⴽⵍⵉ ⵉⴳⴰ ⵜⴰⵎⴰⵜⴰⵔⵜ ⵉ ⵜⵏⴱⴰⴹⵜ ⴷ ⵓⵙⵓⴳⵔ ⴳ ⵡⴰⵎⵓⵏ ⴰⵇⴱⵓⵔ ⵣⵓⵏ ⴷ ⵉⴳⵉⴷⵔⵏ.
ⴷⴰ ⵙⵙⴳⵎⴰⵏ ⵉⵎⵙⴽⴰⵔⵏ ⵓⵚⵚⴽⴰⵢ ⵖⴼ ⵜⴳⵯⵎⵔⵜ ⵙ ⵓⵢⵏⵏⴰ ⵉⵎⵙⴰⵙⴰⵏ ⴰⴽⴷ ⵜⵎⵢⵓⵔⵉⵏ ⵜⵉⵎⵖⵔⴰⴱⵉⵢⵉⵏ ⵜⵉⵇⴱⵓⵔⵉⵏ, ⴰⵔ ⵜⵜⵎⴰⵖⵏ ⵖⴼ ⵡⴰⴷ ⵉⵍⵉⵏ ⴰⵏⴰⵡ ⴰⵙⴰⵍⴰⵏ ⵏⵏⴰ ⴳ ⵍⵍⴰⵏⵜ ⵜⴼⵉⵔⴰⵙ ⵉⵜⵜⵓⵥⵍⴰⵢⵏ ⴳ ⵓⵙⵡⵉⵔ ⵏ ⵜⵉⴷⴷⵉ, ⴷ ⵓⴽⵙⴰⵢ ⴷ ⵜⴰⵣⵖⵉ ⴷ ⵓⵙⵜⴰⵍ, ⴷ ⵜⵍⵖⴰ ⵏ ⵓⵡⵊⵊⵉⵎ ⴷ ⵜⴳⵉⵡⴰⵍ, ⴷ ⵢⵉⵍⵎ … ⵣⵓⵏ ⴷ ⴰⴳⵊⵊⵉⵎ ⵙ ⵓⵎⴷⵢⴰ, ⵢⵓⴼ ⴰⴷ ⵉⴳ ⴰⵡⵔⴻⵔⵔⴰⵢ.
ⵜⴽⴽⴰ ⵜⵜ ⵏⵏ ⵜⴳⵯⵎⵔⵜ ⵙ ⵡⵓⵚⵚⴽⴰⵢ ⵜⴻⵜⵜⵡⴰⵙⵙⵏ ⴷⴰⵔ ⵡⴰⵟⵟⴰⵚ ⵏ ⵜⴰⵡⵙⵉⵜⵉⵏ ⵜⵉⵎⵖⵔⴰⴱⵉⵢⵉ, ⴰⵔ ⵜⴻⵜⵜⵡⴰⵙⴽⴰⵔ ⵙⴰⴷⵓ ⵏ ⵓⵙⴰⵜⵉ ⵏ (ⵛⵛⵉⵅ ⵏ ⵕⵕⵎⴰ) ⵏⵏⴰ ⵉⴱⵟⵟⵓⵏ ⵜⵉⵡⵓⵔⵉⵡⵉⵏ ⵖⴼ ⵉⵎⴷⵔⴰⵡⵏ ⴳ ⵜⵎⵀⵍⵜ ⵏ ⵜⴳⵯⵎⵔⵜ. ⴰⵔ ⵜⵜⴰⵊⴰⵏ ⵉⵎⵙⴽⵉⵔⵏ ⵜⵉⴳⵯⵎⵔⵉⵏ ⴰⴷ ⴷ ⴼⴼⵖⵏⵜ ⵙ ⵓⴱⵣⵣⴻⵣ ⵖ ⵉⴼⵔⴰⵏ ⵏⵏⵙⵏⵜ, ⴹⴼⵓⵕⵏ ⵜⵏⵜ ⵉⵢⴷⴰⵏ ⵓⵚⵚⴽⴰⵢⵏ ⴰⴷ ⵜⵏⵜ ⴰⵎⵥⵏ, ⴳ ⵢⴰⵜ ⵜⵉⵣⵉ ⵏ ⵓⵚⵚⴰⴱ ⴷ ⵜⵎⵙⵉⵣⵡⵉⵔⵜ.
ⵏⵏⴼⵍⵏⵜ ⵜⵉⵍⴰⵍ ⵉⵇⵇⵏⵏ ⵖⵔ ⵡⵓⵚⵚⴽⴰⵢ ⴳ ⵜⵉⵣⵉ ⴰⴷ ⵉⴳⴳⵔⴰⵏ, ⵓⵔ ⵙⵓⵍ ⵉⵇⵇⵉⵎⵉ ⵓⵎⵓⴷⵔ ⴰⴷ ⴷⴰ ⵉⵜⵜⵓⵙⵎⵔⴰⵙ ⴳ ⵜⴳⵯⵎⵔⵜ ⵉⴷⴷⵖ ⵍⵍⴰⵏⵜ ⵜⵎⴳⴳⵉⵜⵉⵏ ⵜⵉⵣⵔⴼⴰⵏⵉⵏ ⴷ ⵜⵎⵙⵙⵓⴳⵓⵔⵉⵏ ⵜⵉⵎⴰⵢⵏⵓⵜⵉⵏ, ⵙⵎⴰⵏ ⴰⵢⴰ ⵖⴰⵡⵍⵏ ⵉⵎⵙⴽⵉⵔⵏ ⵖⵔ ⵜⵉⵍⴰⵍ ⵢⴰⴹⵏ ⵜⵜⴰⴼ ⴰⴷ ⵙⴼⵓⴳⵍⵓⵏ ⵙ ⵡⵓⵚⵚⴽⴰⵢ ⵙ ⵓⴷⵔⴰⵡ ⴳ ⵉⵎⵛⴰⵍⴰⵜⵏ ⴷ ⵉⵙⴼⵙⵔⵏ ⴷ ⵉⵏⵎⵓⴳⴳⴰⵔⵏ ⵉⵎⵢⴰⵏⴰⵡⵏ.