ⵜⵉⵎⵢⵓⵔⵉⵏ ⵏ ⵓⵙⴳⵎⵉ ⵏ ⵉⵍⵖⵎⴰⵏ
ⴰⵖⵏⵜ ⵜⵎⵢⵓⵔⵉⵏ ⵏ ⵓⵙⴳⵎⵉ ⵏ ⵉⵍⵖⵎⴰⵏ ⵜⵉⵎⵏⴰⴹⵉⵏ ⵏ ⵜⵏⵣⵔⵓⴼⵜ ⴷ ⵜⵉⵍⵍⵉ ⵜⵜ ⵉⵔⵡⴰⵙⵏ ⴳ ⵍⵎⵖⵔⵉⴱ. ⴽⴽⴰⵏ ⵜⵜ ⵉⵏⵏ ⵓⵢⴷⴷⵖ ⵏ ⵜⵎⵢⵓⵔⵉⵏ ⵇⵇⵏⵏⵜ ⵖⵔ ⵡⴰⵏⴰⵡ ⵏ ⵜⵓⴷⵔⵜ ⵍⵍⵉ ⵉⴱⴷⴷⴰⵏ ⵖⴼ ⵓⴳⵓⴷⴷⵊⵓ. ⵎⵇⵇⴰⵔ ⵓⵡⵉⵏ ⵉⵎⵣⴷⴰⵖ ⵖⵔ ⵓⵣⴷⵓⵖ, ⵓⵎⴰⵏⵏ ⴷ ⵉⵙⴰⵢⵔⴰⵔⵏ (ⵃⵓⵛ) ⵏ ⵓⵙⴳⵎⵉ ⵏ ⵉⵍⵖⵎⴰⵏ ⴳ ⵡⴰⵜⵜⴰⵢⵏ ⵏ ⵜⵎⴷⵉⵏⵉⵏ ⵏ ⵜⵙⴳⴳⵯⵉⵏ ⵏ ⵉⴼⴼⵓⵙ ⵏ ⵍⵎⵖⵔⵉⴱ ⵏⵏⴰ ⵜⵜ ⵓⵡⵉⵏⵉⵏ ⴳ ⵉⵍⵖⵎⴰⵏ ⵉⵜⵜⵓⵃⵢⵢⴰⵍⵏ ⵉ ⵓⵙⵢⴰⴼⵓ ⵏ ⵓⴽⵯⴼⴼⴰⵢ. ⵉⴷⵜⵜⴰ ⵎⴰⵙ ⵉⵎⴳⵓⴷⴷⵊⴰ ⴷⴰ ⵜⵜ ⵜⵜⴰⵡⵉⵏ ⴳ ⵓⵙⴳⵎⵉ ⵏ ⵡⴰⵛⵜⴰⵍ ⵉⵥⵏⴽⴰⴹ ⴷ ⵡⴰⵖⴰⴹⵏ, ⵎⴰⵛ ⵍⴰ ⵉⵜⵜⵖⵉⵎⴰ ⵡⴰⵕⴰⵎ ⵉⴳⴰ ⵙⴳ ⵎⵉⵏ ⴳ ⵜⵜⴰⵡⵉⵏ ⵉⵎⵣⴷⴰⵖ ⴷ ⴰⵎⵣⵡⴰⵔⵓ ⵎⵉⵏⵣⵉ ⵉⵎⵙⴰⵙⴰ ⴰⴽⴷ ⵉⵎⵔⵔⵉⵜⵏ ⵉⴳⴰⵎⴰⵏ ⵏ ⵜⵏⵣⵔⵓⴼⵜ.
ⵓⵎⴰⵏⵜ ⵜⵎⵢⵔⵓⵉⵏ ⵉⵣⴷⵉⵏ ⴰⴽⴷ ⵓⵙⴳⵎⵉ ⵏ ⵉⵍⵖⵎⴰⵏ ⵜⵓⴳⵜⵜ ⵏ ⵜⵎⵙⴽⵉⵔⵉⵏ ⵏⵏⵉ ⵉⵖⵎⵙⵏ ⵉ ⵉⴳⵔⴰⵏ ⵉⵎⵢⴰⵏⴰⵡⵏ, ⵣⵣⵉⴳⵙ ⵜⴰⵡⵉⵜ ⴳ ⵓⵎⵓⴷⵔ ⴰⴷ ⵙⴳ ⵜⵍⴰⵍⵉⵜ ⵏⵏⵙ ⴷ ⵓⵙⴰⵏⵓⵏ ⵏⵏⵙ ⵉⵎⵉⴽ ⵙ ⵉⵎⵉⴽ ⵜⵜⴰⴼ ⴰⴷ ⵉⵙⴽⵔ ⵜⵉⵡⵓⵔⵉⵡⵉⵏ ⵍⵍⵉ ⵖⵉⴼⵙ ⵉⵍⵍⴰⵏ. ⵍⵍⵉ ⵉⴳⴰⵏ ⴰⵍⵜⵓ ⵉⵙⵢⴰⴼⵓ ⵏ ⵡⵓⵜⵛⵉ, ⴷ ⵓⵥⵟⵟⴰ ⵏ ⵉⵅⴰⵎⵏ, ⴷ ⵜⵎⴳⵓⵔⵉ ⵏ ⵉⵎⴰⵙⵙⵏ ⴷ ⵉⵙⴽⴽⵉⵏⵏ ⵡⴰⵍⵍⴰⵍ ⵣⵓⵏ ⴷⵜⴰⵔⵉⴽⵜ ⵏⵏⴰ ⵉⴱⴹⴰⵏ ⵖⴼ ⵙⵉⵏ ⵡⴰⵏⴰⵡⵏ : ⴰⵎⵣⵡⴰⵔⵓ ⵉⵜⵜⵡⴰⵙⵙⵏ ⵙ (ⵔⵔⵃⵍⴰ) ⵉⵟⵟⵓⵥⵍⴰⵢ ⵙ ⵉⵔⴳⴰⵣⵏ, ⵡⵉⵙ ⵙⵉⵏ ⵉⵜⵜⵡⴰⵙⵙⵏ ⵙ (ⴰⵎⵛⵇⵇⴱ) ⵉⵜⵜⵓⵥⵍⴰⵢⵏ ⵙ ⵜⵎⵟⵟⵓⴹⵜ. ⵇⵇⴰⵃ ⴰⵢⴷⴷⵖ ⵏ ⵜⵎⵀⴰⵍⵉⵏ ⵜⵉⵜⵉⵇⵏⵉⵢⵉⵏ ⵉⵣⴷⵉⵏ ⵙ ⵓⵙⴳⵎⵉ ⵏ ⵉⵍⵖⵎⴰⵏ ⴷ ⵓⵙⵙⴱⵖⵔ ⵣⵣⵉⴳⵙ ⴳ ⵜⵓⴷⵔⵜ ⵜⴰⴽⵓⵢⴰⵙⵙⵜ ⵍⴰ ⵜⵙⵙⵓⵜⵓⵔ ⵉⵊⵊ ⵏ ⵓⵙⴰⵏⵓⵏ ⵉⵥⵍⵉⵏ ⵉⵔⵡⵉⵏ ⵉⵍⴰ ⵡⴰⵎⵓⵏ ⵏ ⵓⴳⵓⴷⴷⵊⵓ ⵙ ⵍⴼⴰⵢⵜ ⵏ ⵜⵎⵔⵙⴰⵍ ⵏⵏⵙ ⵜⵉⵇⴱⵓⵔⵉⵏ.
ⵎⵛ ⵉⴳⴰ ⵓⵍⵖⵎ ⵜⴰⵔⵙⵍⵜ ⵏ ⵜⵓⴷⵔⵜ ⵜⴰⵎⴳⵓⴷⴷⵊⵓⵜ, ⵀⴰⵏ ⴰⴷⴷⵓⵔ ⵏⵏⵙ ⵉⵣⵔⵉ ⵎⴰⵢⴷ ⵉⵇⵇⵏ ⵖⵔ ⵜⵙⴳⴳⵯⵉⵏ ⵜⵉⵥⵕⴼⴰⵏⵉⵏ ⴷ ⵜⵜⵉⵇⵏⵉⵢⵉⵏ ⴰⵍⴰⵎⵉ ⴳⴳⵔⵏⵜ ⵉ ⵉⵖⵣⵡⵔⵏ ⵏ ⵜⵎⴰⵜⴰⵔⵜ. ⵍⴰ ⵙⴼⵓⴳⵍⵓⵏⵜ ⵜⵡⵏⵏⵉⵜⵉⵏ ⵜⵉⵎⵉⵡⴰⵏⵉⵏ ⵙ ⵓⵎⵓⴷⵔ ⴰⴷ ⵙ ⵎⵉⵏ ⵖⵉⵙ ⵉⵜⵜⵢⴰⵏⵏⴰⵏ ⵇⵇⴰⵃ ⵏ ⵜⵏⴼⵓⵙⵉⵏ, ⴷ ⵎⵉⵏ ⵖⵉⴼⵙ ⵉⵜⵜⵓⵙⵡⵍⵍⵉⵏ ⵙⴳ ⵜⵎⴷⵢⴰⵣⵉⵏ ⵏ ⵉⵣⵍⴰⵏ, ⴷ ⵎⵉⵏ ⵖⵉⴼⵙ ⵉⵜⵜⵡⴰⴳⵏ ⵙⴳ ⵉⵏⵣⴰⵏ ⴷ ⵜⵏⵓⵥⴰⵥ. ⴰⵔ ⵙⵎⵔⴰⵙⵏ ⵉⵎⴳⵓⴷⴷⵊⴰ ⵏⴳⴰⵔⵙⵏ ⵢⴰⵏ ⵓⵎⴰⵡⴰⵍ ⵉⴱⵖⵓⵔⵏ ⴳ ⵢⵓⴳⵔ ⴰⴷ, ⴰⵛⴽⵓ ⵉⵙⵎⴰⵡⴰⵏ ⵏ ⵓⵍⵖⵎ ⴷⴰ ⵜⵜⵏⴳⴰⵔⵏ ⵙ ⵓⵏⴳⴰⵔⴰ ⵏ ⵓⵡⵜⴰⵢ ⵏⵏⵙ, ⴷ ⵡⴰⵏⴰⵡⵏ ⵏⵏⵙ, ⴷ ⵜⴼⵔⴽⵜ ⵏ ⵓⵙⴳⵎⵉ ⵏⵏⵙ, ⴷ ⵓⴽⵍⵓ ⵏⵏⵙ, ⴰⵔⵜ.
ⵉⵇⵇⵏⵏ ⵉⵍⵖⵎⴰⵏ ⵙ ⵜⵓⴳⵜⵜ ⵏ ⵜⵡⴰⵍⴰⵜⵉⵏ ⵜⵉⵏⴰⵎⵓⵏⵉⵏ ⴷ ⵜⵏⵎⴰⵜⴰⵔⵉⵏ, ⴰⵔ ⵜⵜⵓⴽⴼⴰⵏ ⴷ ⵜⴰⵔⵣⵣⵉⴼⵜ, ⵏⵖ ⴷ ⴰⵎⵔⵡⴰⵙ, ⵏⵖ ⵜⵉⵖⵔⵙⵉ, ⵏⵖ ⵜⵜⵓⵥⵍⴰⵢⵏ ⵉ ⵓⵎⵛⴰⵍⴰ (ⵍⵍⵣ). ⵎⵛⵉⵙ ⵣⴷⵉⵏⵜ ⵜⵎⵙⴽⵉⵔⵉⵏ ⵉⵎⵢⴰⵏⴰⵡⵏ ⵖⵔ ⵓⴼⵔⴷⵉⵙ ⴰⴷ ⵣⵓⵏ ⴷ ⵜⴰⵙⴳⵏⴰⴼⵜ ⵏ ⵉⵎⵓⴷⴰⵔ ⵜⴰⵇⴱⵓⵔⵜ, ⴷ ⵜⵙⵏⵉⴳⵉⵏ ⵏ ⵓⵔⵣⵣⵓ ⵖⴼ ⵉⴷⵖⴰⵔⵏ ⵏ ⵜⴽⵙⵙⴰ, ⴷ ⵓⵏⵎⵎⴰⵍ ⴳ ⵜⵏⵣⵔⵓⴼⵜ, ⴷ ⵓⴹⴼⴼⵓⵕ ⵏ ⵓⵏⴰⵖⵉⵣ…