ⵜⴰⵎⵓⴷⴰ
ⵢⵓⵙⴰ ⴷ ⵡⴰⵏⵙⴰ ⵏ ⵜⴰⵎⵓⴷⴰ ⴰⴷⵔⵣⴰⵏ ⴳ ⵓⴳⵯⵎⵎⴰⴹ ⴰⴼⴰⵙⵉ ⵏ ⵡⴰⵙⵉⴼ ⵏ ⵎⴰⵔⵜⵉⵍ, ⴳ ⵉⴼⴼⵓⵙ ⵏ ⵓⵖⵍⵍⵓⵢ ⵏ ⵜⵎⴷⵉⵏⵜ ⵏ ⵜⵉⵟⵡⴰⵏ, ⵉⴷⵉⵙ ⵏ ⵓⴱⵔⵉⴷ ⴰⵏⴰⵎⵓⵔ ⵉⵣⴷⵉⵏ ⵏⴳⵔ ⵜⵎⴷⵉⵏⵜ ⵏ ⵜⵉⵟⵡⴰⵏ ⴰⴽⴷ ⵛⴼⵛⴰⵡⵏ. ⴳ ⵓⴷⵖⴰⵔ ⴷⴷⵖ ⵉⵥⵉⵍⵏ ⵉⵍⵍⴰ ⴳ ⵓⴹⴰⵕ ⵏ ⵉⵛⵎⵓⵎⴰ ⵏ ⵉⴷⵓⵔⴰⵔ ⵏ ⵔⵔⵉⴼ, ⴷ ⵖⴼ ⵜⵍⴽⴽⵉ ⵏ ⵡⴰⵙⵉⴼ ⵏ ⵎⴰⵔⵜⵉⵍ ⴰⴳ ⵜⴻⵜⵜⵓⵚⴽⴰ ⵜⴱⵓⵖⵍⵓ ⵜⵎⴷⵉⵏⵜ ⵏ ⵜⴰⵎⵓⴷⴰ.
ⴷⵔⵓⵖ ⴰⵢⴷ ⴰⴽⴽⵯ ⵎⵙⴰⵙⴰⵏ ⵇⵇⴰⵃ ⵉⵎⵥⵍⴰⵢⵏ ⵎⴰⵙ ⴷ ⴰⵙⴰⵍⴰ ⵏ ⵢⵉⵙⵎ ⵏ ⵜⴰⵎⵓⴷⴰ ⴷ ⴰⵎⴰⵣⵉⵖ ⴷ ⵉⴼⴼⵖⵏ ⵙ ⵜⴰⵎⴷⴰ ⵍⵍⵉ ⵏⵜⵜⴰ ⴷ ⵉⵙⵎ ⵏ ⵓⵎⴷⴰ ⵉⵣⴷⵉⵏ ⴰⵙⴰⴽⴰ ⵏ ⵡⴰⵙⵉⴼ. ⵉⵇⵇⵉⵎⴰ ⴰⵀⴰ ⵓⴱⴷⴰⵔ ⴰⵎⵣⵡⴰⵔⵓ ⵏ ⵢⵉⵙⵎ ⵏ ⵜⵎⴷⵉⵏⵜ ⵖⴼ ⵡⵓⴷⵎ ⵏ ⵉⵇⵇⴰⵕⵉⴹⵏ ⵉⴱⵕⵓⵏⵣⵉⵢⵏ ⵏⵏⴰ ⵉⵜⵜⵡⴰⴷⴷⵣⴰⵏ ⴷ ⵓⴷⵖⴰⵔ, ⵎⵛⵉⵙ ⵜⵜⵢⴰⵔⴰⵏ ⵙ ⵜⵉⵔⵔⴰ ⵜⵉⴱⵓⵏⵉⵢⵉⵏ ⵜⵉⵎⴰⵢⵏⵓⵜⵉⵏ : (TMT, TMD,TMDA, TMGD) ⴳ ⵜⵙⵓⵜⴰ ⵜⴰⵎⵣⵡⴰⵔⵓⵜ ⴷⴰⵜ ⵏ ⵜⵍⴰⵍⵉⵜ. ⴳ ⵜⵙⵓⵜⴰ ⴷⴷⵖ ⵏⵏⵉⴽ, ⵢⵓⵡⵉ ⴷ ⴱⵉⵍⵉⵏⵉ ⵛⵛⵉⵅ (79 ⴳ ⵜⵍⴰⵍⵉⵜ) ⴳ ⵓⴷⵍⵉⵙ ⵏⵏⵙ ⴰⵎⵣⵔⵓⵢ ⴰⴳⴰⵎⴰⵏ ⵜⴰⵎⴰⵜⴰⵔⵜ ⵉⴷⴷⵔⴼⵏ ⵖⴼ ⵡⴰⵙⵉⴼ ⵏ ⵜⴰⵎⵓⴷⴰ ⴷ ⵖⴼ ⵜⵎⴷⵉⵏⵜ ⵢⵓⵙⵉⵏ ⵉⵙⵎ ⴷⴷⵖ ⵏⵏⵉⴽ. ⵎⴰⵛⴰⵏ ⵉⵊⵢⵓⴳⵔⴰⴼⵉⵢⵏ ⴱⵓⵎⴱⵉⵏⵓⵙ ⵎⵉⵍⴰ ( 45 ⴳ ⵜⵍⴰⵍⵉⵜ), ⴷ ⴱⴰⵟⵍⵉⵎⵓⵙ 5 168 ⴳ ⵜⵍⴰⵍⵉⵜ) ⴱⴷⵔⵏ ⵖⴰⵙ ⴰⵙⵉⴼ ⵏ ⵜⴰⵎⵓⴷⴰ ⴱⵍⴰ ⴼⴽⴰⵏ ⴽⵔⴰ ⵏ ⵜⵎⴰⵜⴰⵔⵜ ⵖⴼ ⵜⵎⴷⵉⵏⵜ ⵏ ⵜⴰⵎⵓⴷⴰ, ⵏⵏⴰ ⵎⵉ ⵓⵔ ⵉⵙⵓⵍ ⵓⵏⴰⵖⵉⵣ ⵏⵏⵙ ⴳ ⵓⵣⵎⵣ ⵏⵏⵙⵏ ⴷⴼⴼⵔ ⵎⵉⵏ ⵜⵜⵓⵅⵍⴰ ⴳ ⵓⵣⴳⵏ ⵏ ⵜⵙⵓⵜⴰ ⵜⴰⵎⵣⵡⴰⵔⵓⵜ ⵏ ⵜⵍⴰⵍⵉⵜ. ⴳ ⵜⵙⵓⵜⵉⵡⵉⵏ ⵢⴰⴹⵏⵉⵏ, ⵏⵓⵎⴰⵕ ⵜⴰⵙⵓⵜⴰ ⵜⵉⵙ ⵙⵎⵎⵓⵙⵜ ⵏ ⵜⵍⴰⵍⵉⵜ ⵢⵓⵡⵉ ⴷ ⵓⴹⵕⵉⵚ ⵏ : Notitia Dignitatum ⵍⵍⵉ ⵉⴳⴰⵏ ⵙⴳ ⵡⵓⴷⵎⴰⵡⵏ ⵉⴽⵙⵡⴰⵜⵏ ⵏ ⵜⵎⴷⵉⵏⵜ ⴷ ⵜⵙⵔⴷⴰⵙⵜ ⴳ ⵜⵎⵏⵓⴽⴷⴰ ⵜⴰⵕⵓⵎⴰⵏⵉⵜ, ⵎⴰⵙ ⴷ ⵙⴳ ⵜⵔⵓⴱⴱⴰ ⵏ ⵉⵙⵔⴷⴰⵙ ⵏ ⵉⵡⵜⵜⴰ ⵉⵕⵓⵎⴰⵏⵉⵢⵏ ⵍⵍⵉ ⵜⵜ ⵉⵏⵏ ⵉⴽⴽⴰ ⵣⴷⵉⵏ ⵎⵓⵕⵉⵟⴰⵏⵢⴰ ⵟⵏⵊⵉⵢⴰ , ⴷ ⵜⴰⵔⴰⴱⴱⵓⵜ ⵏ ⵉⴳⵍⴷⴰⵏ ⵉⵀⵉⵔⵇⵍⵉⵢⵏ (Alae Herculae) ⵏⵏⴰ ⵜⵜ ⵏⵏ ⵉⴽⴽⴰⵏ ⵙⵙⵕⵙⴰⵏ ⴳ ⵓⴳⴰⴷⵉⵔ ⵏ ⵜⴰⵎⴳⵓ (Tamuco), ⵍⵍⵉ ⵏⵜⵜⴰ ⴷ ⴰⴳⴰⴷⵉⵔ ⵏ ⵜⴰⵎⵓⴷⴰ ⵏ ⵖⵉⵍⴰⴷ.
ⴷⴼⴼⵔ ⵜⵓⴳⴳⵜ ⵏ ⵜⵔⵎⵉⵜⵉⵏ ⵏⵏⴰ ⴳⴰⵏ ⵉⵊⵢⵓⴳⵔⴰⴼⵉⵢⵏ ⴷ ⵉⵎⵓⵙⵏⴰⵡⵏ ⵏ ⵓⴷⵔⵉⵣ ⴰⴼⴰⴷ ⴰⴷ ⴰⴼⵏ ⴰⴷⵖⴰⵔ ⴳ ⵜⵍⵍⴰ ⵜⴰⵎⵓⴷⴰ, ⵉⵣⵎⵔ ⵓⵎⵔⵣⵓ ⴰⵚⴱⵏⵢⵍⵉⵢ ⵙⵉⵥⴰⵕ ⵍⵡⵉⵙ ⴷⵉⵎⵓⵏⵟⴰⵍⵢⴰⵏ (César Luis de Montalban), , ⴰⴷ ⵢⴰⴼ ⵜⴰⵎⴷⵉⵏⵜ ⵏ ⵜⴰⵎⵓⴷⴰ ⴳ ⵓⵙⴳⴳⵯⴰⵙⵏ 1921. ⵙⴳ ⴷⵉⵏⵏⴰⵖ, ⴰⵔ ⴰⵙⵙ ⴰ, ⵙⵓⵍⵏ ⵡⵓⵖⵓⵣⵏ ⵉⴷⵔⵣⴰⵏⵏ ⴳ ⵡⴰⵏⵙⴰ ⵖⴼ ⵓⴼⵓⵙ ⵏ ⵉⵎⵔⵣⵓⵜⵏ ⵉⵎⵖⵔⴰⴱⵉⵢⵏ ⴷ ⵉⵚⴱⵏⵢⵓⵍⵏ.
ⵙⵙⵏⵥⴰⵏ ⵡⵓⵖⵓⵣⵏ ⵉⴷⵔⵣⴰⵏ ⵉⴼⵉ ⵏ ⵙⵉⵏ ⵉⴼⵔⵓⵔⵓⵢⵏ ⵏ ⵙⵏⴰⵜ ⵉⵣⵎⴰⵣⵏ, ⴰⵣⵎⵣ ⴰⵎⵓⵔⵉⵢ, ⴷ ⵓⵣⵎⵣ ⴰⵕⵓⵎⴰⵏⵉⵢ.
ⴳ ⵜⵉⵣⵉ ⵜⴰⵎⵓⵔⵉⵢⵜ, ⵜⵜⵢⴰⴼⴰⵏ ⵉⴼⵔⵓⵔⵓⵢⵏ ⵉⴷⵔⵣⴰⵏⵏ ⵏ ⵜⵎⴷⵉⵏⵜ, ⵉⵎⵎⴷⵍⵉⵏ ⴷⵖⵓⵖ ⴷⴷ ⵖⴼ ⵜⵊⵓⵎⵎⴰ ⵏ 5 ⵏ ⵍⴽⵟⴰⵕⴰⵜ. ⵜⵙⵙⵏ ⵜⵎⴷⵉⵏⵜ ⵏ ⵜⴰⵎⵓⴷⴰ ⵜⴰⵎⵓⵔⵉⵢⵜ ⴰⵣⵣⵉⴳⵣ ⴰⵖⵔⵎⴰⵏ ⵉⴱⵓⵖⵍⴰⵏ ⵢⵓⵡⴹⵏ ⵖⵔ ⴰⴼⵍⵍⴰ ⴳ ⵜⵙⵓⵜⴰ ⵜⵉⵙ ⵙⵏⴰⵜ ⴷ ⵜⵎⵣⵡⴰⵔⵓⵜ ⴷⴰⵜ ⵏ ⵜⵍⴰⵍⵉⵜ. ⵢⵓⵎⴰⵏ ⴷ ⵓⵙⵡⵉⵔ ⴰⴷ ⴰⵖⵔⵎⴰⵏ ⴳ ⵓⵙⵏⵎⴰⵍⴰ ⵓⵚⴽⵉⵡ ⵓⵏⵥⵉⵥ, ⵏⵏⴰ ⵉⵎⵙⴰⵙⴰⵏ ⴰⴽⴷ ⵜⵓⵥⵍⴰⵢⵉⵏ ⵙ ⵜⴻⵜⵜⵓⵙⴰⵜⵢ ⵜⵎⴷⵉⵏⵜ ⵜⴰⵀⴰⵍⴰⵏⵉⵙⵉⵜⵢⵜ, ⴰⵙⵖⵉⵡⵙ ⵏⵏⵙ ⵉⵙⵏⵎⴰⵍⴰⵏ ⵉⵖⵍⴰⴷⵏ ⵏⵏⵙ ⴷ ⵜⵓⵚⴽⴰⵡⵉⵏ ⵓⵔ ⵉⴽⴽⵓⵍ ⴰⴷ ⵢⵓⵖⵓⵍ ⵖⵔ ⵉⵙⵖⵉⵡⵙⵏ ⵏⵏⵙ ⴷ ⵓⵚⴽⵓ ⵏⵏⵏⵙ ⵙ ⵢⴰⵜ ⵜⵉⴽⴽⵍⵉⵜ. ⵖⵎⴽⵍⵍⵉ ⵜⵙⵙⵏ ⵜⵎⴷⵉⵏⵜ ⴰⵍⵜⵓ ⵢⴰⵏ ⵓⴱⵓⵖⵍⵓ ⵏ ⵜⵎⴳⵓⵔⴰ ⵜⵉⵏⵉⴹⵉⵏ ⵜⵉⴷⵖⴰⵔⴰⵏⵉⵏ ⵣⵓⵏ ⴷ ⵜⴰⵎⴳⵓⵔⵉⵏ ⵉⴷⵇⵇⵉ, ⵜⵓⴷⴷⵣⵓⵜ ⵏ ⵉⴷⵔⵉⵎⵏ ; ⵜⴷⴷⵣⴰ ⵜⵎⴷⵉⵏⵜ ⵉⴷⵔⵉⵎⵏ ⵙ ⵢⵉⵙⵎⴰⵡⵏ ⵏ ⵉⴳⵍⴷⴰⵏ ⵏ ⵜⴳⵍⴷⵉⵜ ⵜⴰⵎⵓⵔⵉⵢⵜ ⵙ ⵜⵉⵔⵔⴰ ⵜⵉⴱⵢⵏⵉⵢⵉⵏ- ⵜⵉⵎⴰⵢⵏⵓⵜⵉⵏ. ⵉⴷⴷⵖ ⵜⵍⴰ ⵜⵎⴷⵉⵏⵜ ⴰⵙⴰⴳⵯⵏ ⵏ ⵡⴰⵙⵉⴼ ⴷ ⵡⴰⴷⴰⵙ ⵏⵏⵙ ⵖⵔ ⵢⵉⵍⵍ ⵢⵓⵡⵙ ⴰⵙ ⴳ ⵓⵏⵏⵓⵕⵥⵎ ⵏⵏⵙ ⵖⴼ ⵉⵙⵎⵔⴰⵔⵜⵏ ⵏ ⵜⵙⴱⴱⴰⴱⵜ ⴰⴽⴷ ⵜⴳⵣⵉⵔⵜ ⵜⵉⴱⵉⵔⵉⵢⵜ ⴷ ⵜⵎⴷⵉⵏⵉⵏ ⴷ ⵉⵡⴰⵏⴽⵏ ⵏ ⵢⵉⵍⵍ ⴰⵛⵎⵍⴰⵍ ⴰⵏⴰⵎⵎⴰⵙ.
ⵜⴻⵜⵜⵡⴰⵖ ⵜⵎⴷⵉⵏⵜ ⵏ ⵜⴰⵎⵓⴷⴰ ⵙ ⵜⵎⵀⵍⵜ ⵏ ⵓⵔⵔⵓⵎⵎⵓ ⴳ ⵜⵙⵓⵜⴰ ⵜⴰⵎⴳⴳⴰⵔⵓⵜ ⵏ ⵢⵉⵍⵉ ⵏⵏⵙ, ⴰⵎⵣⵡⴰⵔⵓ ⴷⵉ ⵜⴳⵉⵔⴰ ⵏ ⵜⵙⵓⵜⴰ ⵜⴰⵎⵣⵡⴰⵔⵓⵜ ⴷⴰⵜ ⵏ ⵜⵍⴰⵍⵉⵜ ⴰⵜⵜⴰⵢⵏ ⵏ ⵓⵙⴳⴳⵯⴰⵙ ⵏ 38 ⴷⴰⵜ ⵜⵍⴰⵍⵉⵜ ⵏ ⵍⵎⴰⵙⵉⵃ. ⴷⵔⵓⵖ ⴰⵢⴷ ⴷ ⵓⵔ ⵜⵙⵙⴰⵖⵓⵍ ⵜⵎⴷⵉⵏⵜ ⵜⵓⴷⵔⵜ ⵏⵏⵙ ⴷ ⵓⴱⵓⵖⵍⵓ ⵏⵏⵙ ⴰⵍⵍⵉⴳ ⴷⵉⵖ ⵜⵜⵡⴰⵜ ⵜⵉⴽⴽⵍⵜ ⵏⵏⵉⴹⵏ ⵜⵅⵍⵓ ⵜⵔⵔⴷⵍ ⵙ ⵡⴰⴱⴷⴰ ⴰⵜⵜⴰⵢⵏ ⵏ ⵓⵙⴳⴳⵯⴰⵙ ⵏ 40 ⴳ ⵜⵍⴰⵍⵉⵜ ⵙ ⵓⴷⴼⵔⵉⵔ ⴰⵕⵓⵎⴰⵏⵉⵢ ⴷⴼⴼⵔ ⵏ ⵎⵏⵖⵉⵡⵜ ⵏ ⵓⴳⵍⵍⵉⴷ ⴰⵎⵓⵔⵉⵢ ⴰⵎⴳⴳⴰⵔⵓ ⴱⴰⵟⵍⵉⵎⵓⵙ ⵜⴽⴽⵔ ⵜⴳⵔⴰⵡⵍⴰ ⵏ ⴰⴷⵉⵎⵓⵏ, ⴰⵛⴽⵓ ⵜⴻⵜⵜⵓⵙⵡⴰⵍⴰ ⵜⴳⵍⴷⵉⵜ ⵜⴰⵎⵓⵔⵉⵢⵜ ⵉ ⵜⵙⴳⴳⵯⵉⵏ ⵏ ⵜⵎⵏⵓⴽⴷⴰ ⵜⴰⵕⵓⵎⴰⵏⵉⵜ ⴳ ⵜⵓⵣⵎⵣ ⵏ ⵓⵎⵏⴽⵓⴷ ⴳⵍⵓⴷ (Claude).
ⵖ ⵉⴳⴳⵉ ⵏ ⵢⴰⵏ ⵓⴳⵣⵣⵓⵎ ⵙⴳ ⵓⵢⵏⵏⴰ ⴷ ⵉⵖⴰⵎⴰⵏ ⴳ ⵜⵎⴷⵉⵏⵜ ⵜⴰⵎⵓⵔⵉⵜ, ⵉⵚⴽⴰ ⵓⴷⴼⵔⵉⵔ ⴰⵕⵓⵎⴰⵏⵉⵢ ⵉⵊⵊ ⵏ ⵓⵖⵔⴰⴱ ⴰⵙⵔⴷⴰⵙ ⵉ ⵜⵉⴹⴰⴼ ; ⴰⵔ ⵜⵜⵉⵏⵉⵏ ⵡⵉⵙ ⵥⵍⵉⵏⵉⵏ ⴳ ⵓⵎⵣⵔⵓⵢ ⵎⴰⵙ ⵍⵍⴰ ⵉⵜⵜⴰⵖⵓⵍ ⵓⵚⴽⵓ ⵏⵏⵙ ⵖⵔ ⵓⵣⴳⵏ ⵏ ⵜⵙⵓⵜⴰ ⵜⴰⵎⵣⵡⴰⵔⵓⵜ ⵏ ⵜⵍⴰⵍⵉⵜ, ⵉⵇⵇⵉⵎ ⵉⵍⵍⴰ ⵓⵢⴷⴷⵖ ⵏ ⵓⵖⵔⴰⴱ ⴰⵔ ⵜⴰⵙⵓⵜⴰ ⵜⵉⵙ ⵙⵎⵎⵓⵙⵜ ⴳ ⵜⵍⴰⵍⵉⵜ.
ⵉⵍⴰ ⵓⵖⵔⴰⴱ ⵏ ⵜⴰⵎⵓⴷⴰ ⴰⵕⵓⵎⴰⵏⵉ ⵜⴰⵍⵖⴰ ⵜⴰⵎⴽⴽⵓⵥⵜ, ⴰⵔ ⵜⴻⵜⵜⴰⵡⴹ ⵜⴰⵖⵣⵉ ⵏ ⵓⵖⵣⴷⵉⵙ ⵏⵏⵙ ⵏⴳⵔ 91 ⵎⵉⵜⵔⵓ ⴷ 99 ⵎⵉⵜⵔⵓ, ⴰⵔ ⵜⴻⵜⵜⴰⵡⴹ ⵜⵊⵓⵎⵎⴰ ⵏⵏⵙ 9000ⵎ2 . ⵉⵍⴰ ⵓⵏⴳⵔⴰⵡ ⴰⵎⵣⴰⵖⴰⵏ ⵏ ⵓⵖⵔⴰⴱ ⴽⴽⵓⵥⵟ ⵏ ⵜⴼⵍⵡⵉⵏ ⵜⵓⴳⴳⴰ ⴽⵓ ⵉⵛⵜ ⴷⵉⴳⵙⵏⵜ ⵜⵙⴳⴳⵯⵉⵏ ⵜⵉⵏⵚⵍⵉⵢⵉⵏ, ⴱⵍⴰ ⵏ ⵉⵖⵔⴰⴱⵏ ⴷ ⵙⵉⵏⵎⵔⴰⵡ ⵏ ⵡⴰⵍⴱⵕⵊ.
ⵜⵙⵙⵓⴷⴼ ⵜⵎⴰⵡⴰⵙⵜ ⵏ ⵜⴷⵍⵙⴰ ⴰⵏⵙⴰ ⵏ ⵜⴰⵎⵓⴷⴰ ⴰⴷⵔⵣⴰⵏ ⴳ ⵡⵓⵟⵟⵓⵏ ⵏ ⵉⴷⵔⵉⵣⵏ ⵉⵏⴰⵎⵓⵔⵏ ⴰⵙⴳⴳⵯⴰⵙ ⵏ 2005, ⵉⵡⴰⵍⴰ ⴷ ⴷⴼⴼⵔ ⵎⴰⵏ ⴰⵢⵏⵏⵉ ⵓⵕⵥⵥⵓⵎ ⵏ ⵉⵖⴰⵡⴰⵙⵏ ⵉⴷⴷⵖ ⵉⵍⵍⴰ ⴰⴷ ⵜⵜⵓⵔⴰⵔⵜ ⵜⵖⴹⴼⵜ ⵖⵔ ⵡⴰⵏⵙⴰ ⵙ ⵉⵖⴰⵡⴰⵙⵏ ⵉⵎⴰⵙⵙⴰⵏⵏ ⵏ ⵓⵓⵔⵣⵣⵓ ⴰⴷⵔⵣⴰⵏ ⵜⵜⴰⴼ ⴰⴷ ⵢⵉⵍⵉ ⵓⵙⵎⴰⵢⵏⵓ ⵏ ⵡⵓⵎⵍⴰⵏ ⵉⵍⵍⴰⵏ ⵙ ⵎⵉⵏ ⵉⵥⵍⵉⵏ ⵙ ⵓⵎⵣⵔⵓⵢ ⵏ ⵜⴰⵎⵓⴷⴰ, ⴷ ⵉⵙⵏⴼⴰⵔⵏ ⵏ ⵜⴽⵏⵏⴰⵡⵜ ⵉ ⵉⴼⵔⵓⵔⵓⵢⵏ ⵉⴷⵔⵣⴰⵏⵏ, ⴷ ⵓⵕⵥⵥⵓⵎ ⵏ ⵡⴰⵏⵙⴰ ⵉ ⵉⵏⵔⵣⴰⴼⵏ.
ⵉⵍⵍⴰ ⵡⴰⵏⵙⴰ ⵏ ⴱⵏⴰⵚⴰ ⴰⴷⵔⵣⴰⵏ ⵖⴼ ⵜⵓⴳⴳⵊⵜ ⵏ ⵡⴰⵜⵜⴰⵢⵏ ⵏ 17 ⴽⵉⵍⵓⵎⵉⵟⵕ ⴳ ⵓⵖⵍⵍⵓⵢ ⵏ ⵜⵎⴷⵉⵏⵜ ⵏ ⵓⵙⵏⴼⴰⵔ ⵏ ⴱⵍⵇⵚⵉⵕⵉ, ⴳ ⵜⵓⵥⵥⵎⵜ ⵏ ⵏ ⵓⵣⴰⵖⴰⵔ ⵏ ⵍⵖⵍⵍⵓⵢ ⵖⴼ ⵓⴳⵎⵎⴰⴹ ⴰⵣⵍⴳⵉ ⵏ ⵡⴰⵙⵉⴼ ⵙⴱⵓ ⵏⵏⴰ ⵜⵜ ⵏⵏ ⵉⴽⴽⴰⵏ ⵣⵉⴽⴽ ⵉⵖⵓⴷⴰ ⵉ ⵜⵢⵍⴰⵏⵜ ⵙ ⵎⵉⵏ ⴷ ⵜⵓⵡⵉ ⵜⵓⵍⵍⵉⵙⵜ ⵏ ⵓⵏⵎⵣⵔⵓⵢ ⴰⵡⵍⴰⵜⵉⵏⵉ ⴱⵉⵍⵉⵏⵢⵓⵙ ⵛⵛⵉⵅ ( ⴰⵙⴳⴳⵯⴰⵙ ⵏ 70 ⴳ ⵜⵍⴰⵍⵉⵜ).
ⵓⴼⴰⵏ ⵡⵓⵖⵓⵣⵏ ⵉⴷⵔⵣⴰⵏⵏ ⵉⵇⴱⵓⵔⵏ ⵏⵏⴰ ⵉⵜⵜⵓⴳⵏⵏ ⴳ ⵡⴰⵏⵙⴰ ⵜⵓⴳⵜⵜ ⵏ ⵉⵎⴰⵙⵙⵏ ⵉⵎⵢⴰⵏⴰⵡⵏ ⵍⵍⵉ ⵉⵜⵜⵓⵙⴽⴰⵔⵏ ⵖ ⵓⵥⵕⵓ ⵏ ⵜⵏⵉⵛⵛⴰ ⵍⵍⵉ ⵉⵙⴽⴰⵏⵏ ⵎⴰⵙ ⴷ ⴰⵣⴷⵓⵖ ⴰⴽⴽⵯ ⵉⵇⵇⴱⵓⵔⵏ ⴳ ⵡⴰⵏⵙⴰ ⵍⵍⴰ ⵉⵜⵜⴰⵖⵓⵍ ⵖⵔ ⵜⵉⵣⵉ ⵏ ⴷⴰⵜ ⵓⵎⵣⵔⵓⵢ.
ⵉⵍⵍⴰ ⵎⴰⴷ ⵉⵜⵜⵉⵖⵉⵍⵏ ⴰⵍⵜⵓ ⵙ ⵉⴱⴷⴷⵉ ⵖⴼ ⵜⵓⴳⵜⵜ ⵏ ⵜⴱⵓⵇⵇⴰⵍⵉⵏ ⵏ ⵜⴰⵊⵊⴰⵊⵉⵏ ⴷ ⵜⵣⵓⵣⴰⴼ ⵉⵍⴰⵏ ⵓⴹⵓⵚⵏ ⵉⴼⵉⵏⵉⵇⵉⵢⵏ ⵎⴰⵙ ⴷ ⴰⵎⵎⴰⵙ ⴰⴷ ⵉⴽⴽⴰ ⵜⵜ ⵏ ⵎⴰⴳ ⵜ ⵜⵣⴷⵉ ⵜⵎⵢⴰⵇⵇⴰⵏⵜ ⵏ ⵜⵙⴱⴱⴰⴱⵜ ⴰⴽⴷ ⵡⴰⵎⵎⴰⵙⵏ ⵏⵏⵉⴹ ⴷⵉ ⵓⴳⵯⵍⵎⴰⵎ ⵏ ⵢⵉⵍⵍ ⴰⵛⵎⵍⴰⵍ ⴰⵏⴰⵎⵎⴰⵙ ⵣⵉ ⵜⵉⵣⵉ ⵏ ⵉⴼⵉⵏⵉⵇⵉⵢⵏ, ⴰⵢⵏⵏⴰ ⵉⵜⵜⴳⵏ ⴷⴰⵜ ⵜⵙⵓⵜⴰ ⵜⵉⵙ ⵙⵎⵎⵓⵙⵜ ⵏ ⴷⴰⵜ ⵜⵍⴰⵍⵉⵜ, ⴷⴼⴼⵔ ⴰⵎⵣⵔⵓⵢ ⴰⴷ ⴳ ⵜⵙⵓⵜⴰ ⵜⴰⴱⵓⵏⵉⵜ.
ⴳ ⵜⵉⵣⵡⵓⵔⵉ ⵏ ⵜⵙⵓⵜⴰ ⵜⵉⵙ ⴽⴽⵓⵥⵟ ⴰⵔ ⵜⴰⵙⵓⵜⴰ ⵜⴰⵎⵣⵡⴰⵔⵓⵜ ⵏ ⴷⴰⵜ ⵜⵍⴰⵍⵉⵜ, ⵉⵙⵙⵏ ⵡⴰⵏⵙⴰ ⵉⵍⵉ ⵉⵙⴰⴽⵯⵏⵏ ⵏ ⵉⴷⵇⵇⵉ ⴽⴰⵏ ⵜⵜ ⵏⵏ ⵍⵍⴰ ⵙⵢⴰⴼⵓⵏ ⵉⵎⵜⵜⵉⵡⵏ ⵉⵏⴳⴰⵔⴰⵏ ⵣⵓⵏ ⴷ ⵜⵉⴱⵓⵇⵇⴰⵍⵉⵏ ⴷ ⵉⵔⵓⴽⵓⵜⵏ ⵙⴳ ⵉⴷⵇⵇⵉ ⵉⵖⵎⴰⵏ ⴷ ⵉⴷⵇⵇⵉ ⴰⴼⵔⴰⵔ ⴷ ⴽⵔⴰ ⵢⴰⴹⵏ. ⴽⵔⴰ ⵣⵣⵖ ⵉⵔⵓⴽⵓⵜⵏ ⴰⴷ ⴽⵙⵉⵏ ⵓⴹⵓⵚⵏ ⵙⴳ ⵉⴷⵇⵇⵉ ⴰⵕⵓⵎⴰⵏⵉ. ⵎⴰⵛⴰ ⴰⴷⵔⵉⵣⵏ ⵏ ⵜⵓⵥⴽⴰ ⵜⴰⵇⴱⵓⵔⵜ ⴷⵉ ⵡⴰⵏⵙⴰ ⵉⴳⴰ ⵙⴳ ⵜⵓⵚⴽⴰⵡⵉⵏ ⵏ ⵍⴳⴰⵊⵓⵕ ⵉⵇⵓⵔⵏ ⵉⵜⵜⴰⵖⵓⵍⵏ ⵖⵔ ⵜⵙⵓⵜⴰ ⵜⵉⵙ ⴽⵕⴰⴹⵜ ⵏ ⴷⴰⵜ ⵜⵍⴰⵍⵉⵜ.
ⴷⵉ ⵜⵉⵣⵉ ⵉⵟⵟⴼⵏ ⵏⴳⵔ 33ⴷ 27 ⵏ ⴷⴰⵜ ⵜⵍⴰⵍⵉⵜ, ⵜⴷⵡⵍ ⵜⵎⴷⵉⵏⵜ ⵜⴰⵎⵓⵔⵉⵢⵜ ⴷ ⴰⵣⴷⵓⵖ ⴰⵕⵓⵎⴰⵏⵉⵢ ⵉⴽⵙⵉⵏ ⵉⵙⵎ ⵏ ⵢⵓⵍⵢⴰ ⴼⴰⵍⵉⵏⵜⵉⵢⴰ ⴱⴰⵏⴰⵚⴰ. ⴷ ⵉⵙⵓⵍ ⵓⴷⵔⵉⵣ ⵏ ⵜⵣⴷⵓⵖⵜ ⴰⴷ ⵉⵇⵇⵉⵎⴰ ⵓⵔ ⵜⴰ ⵜⵜⵢⴰⴽⵣⵏⵜ ⵜⴼⵔⴰⵙ ⵏⵏⵙ ⴰⵔ ⵖⵉⵍⴰⴷ, ⴷ ⵓⵔ ⵉⴽⴽⵓⵍ ⵓⵏⴳⵔⴰⵡ ⵓⵚⴽⵉⵡ ⵏ ⵓⵙⵓⵏ ⴰⴳⴷⵓⴷⴰⵏ ⵏ ⵜⵎⴷⵉⵏⵜ ⴰⴷ ⴰⴷ ⵉⴷⵡⵍ ⵖⵔ ⵜⵉⵣⵉ ⴰⴷ.
ⵖⵓⵔ ⵜⵉⵣⵡⵓⵔⵉ ⵏ ⵓⵏⴱⴰⴹ ⵏ ⵓⵎⵏⴽⵓⴷ ⵎⴰⵕⴽ ⵓⵕⵓⵍⵢⵓⵙ, ⵜⴰⵖⵓⵍ ⴱⴰⵏⵚⴰ ⴷ ⵜⴰⵎⵙⴷⵓⵔⵔⵉⵜ ⵜⴰⵡⵔⴱⵉⵍⵜ ⵜⵇⵇⵉⵎ ⴰⵀⴰ ⵙⴳ ⴰⵎⵏ ⴷ ⴰⵎⵎⴰⵙ ⵉⴱⵓⵖⵍⴰⵏ ⴰⵔ ⵉⵡⵜⵜⴰ ⵏ ⵓⵙⴳⴳⵯⴰⵙ ⵏ 285 ⴷ ⵜⵍⴰⵍⵉⵜ ⴷⵔⵓⵖ ⴷⴷ, ⵏⵏⴰ ⵉⵎⵢⴰⴽⵓⴷⵏ ⴰⴽⴷ ⵜⵕⵓⵥⵉ ⵏ ⵜⵎⵙⵙⵓⴳⵓⵔⵜ ⵜⴰⵕⵓⵎⴰⵏⵉⵜ ⵙⴳ ⵜⵎⵏⴰⴹⵜ ⴷ ⵢⵓⵙⵉⵏ ⴷⵉ ⵉⴼⴼⵓⵙ ⵏ ⵡⴰⵙⵉⴼ ⵏ ⵍⵍⵓⴽⵓⵙ.
ⴰⵔ ⵙⵄⵏⴰⵜⵏ ⴽⵔⴰ ⵏ ⵢⵉⴼⵉⵜⵏ ⴰⴷⵔⵣⴰⵏ ⵏⵏⴰ ⵉⵜⵜⴰⵖⵓⵍ ⵖⵔ ⵜⵙⵓⵜⴰ ⵜⵉⵙ ⴽⴽⵓⵥⵜ ⴳ ⵜⵍⴰⵍⵉⵜ ⵎⴰⵙ ⵉⵙⵓⵍ ⵓⵙⵣⴷⵖ ⴳ ⵡⴰⵏⵙⴰ ⵏ ⴱⴰⵏⵚⴰ ⴷⴼⴼⵔ ⵎⵉⵏ ⵜⵕⵥⴰ ⵜⵎⵙⵙⵓⴳⵓⵔⵜ ⵏ ⵕⵕⵓⵎⴰⵏ ⴰⵔ ⵉⵡⵜⵜⴰ ⵏ ⵜⵉⵣⵉ ⵜⴰⵏⵙⵍⵎⵜ ( ⵜⴰⵙⵓⵜⴰ ⵜⵉⵙ ⵙⵏⴰⵜ ⴷ ⵎⵔⴰⵡⵜ), ⴰⵎ ⵓⵢⵏⵏⴰ ⵎⵎⴰⵍⵏ ⵉⴼⵔⵓⵔⵓⵢⵏ ⵉⴷⵔⵣⴰⵏⵜ ⴷ ⵉⵎⵜⵜⵉⵡⵏ ⵏ ⵉⴷⵇⵇⵉ ⵉⵜⵜⵢⴰⴼⴰⵏ ⴷⵖⵉ ⴳ ⵓⵙⵓⵏ ⵏ ⵉⴼⴼⵓⵙ, ⵛⵡⵉ ⵉⴷⵡⵍ ⵡⴰⵏⵙⴰ ⴷ ⴰⵏⵙⴰ ⵏ ⵓⵔⵣⴰⴼ ⵏ ⵢⵉⴰⵎⵏ ⴳ ⵍⵍⴰⵏ ⴽⵕⴰⴹ ⵉⴷⴱⵏⴰⵏ ⵡⴰⵍⵍⵉ ⴳⵉⵙ ⵉⵙⵜⴰⵡⵀⵎⵎⴰⵏ ⴷ ⴰⴷⴱⵏⵉ ⵏ ⵙⵉⴷⵉ ⵄⵍⵉ ⴱⵓⵊⵏⵓⵏ ⵏⵏⴰ ⵉⵙⵓⵍⵏ ⴷⴰ ⵉⵙⵏⴱⴳⵉⵏ ⴰⵟⵟⴰⵚ ⵉⵎⵔⵣⴰⴼⵏ.