ⵜⵉⵜⵇⵏⵉⵢⵉⵏ ⵏ ⵓⴱⵟⵟⵓ ⵏ ⵡⴰⵎⴰⵏ ⴳ ⵢⵉⴳⵔ ⴰⴼⴰⵔⴰⵏ
ⵍⴰⵏ ⵡⴰⵎⴰⵏ ⵉⵊⵊⵏ ⵡⴰⴷⴷⵓⵔ ⴰⵅⴰⵜⴰⵔ ⵉⵥⵍⵉⵏ ⴳ ⵜⵖⵍⵉⵡⵉⵏ ⵢⴰⵖⵏ ⵜⵉⵎⵏⴰⴹⵉⵏ ⵏ ⵜⵏⵣⵔⵓⴼⵜ ⴷ ⵜⵉⴷ ⵜⵜ ⵉⵔⵡⴰⵙⵏ, ⵉⴷⴷⵖ ⵓⵔ ⴷⴰ ⴷⵉⴳⵙⵏⵜ ⵉⵟⵟⴰⵕ ⵛⵉⴳⴰⵏ ⵏ ⵓⵏⵥⴰⵕ ⴰⵙⵏⵜ ⵉⴳⴰⵏ, ⴷ ⵉⵍⵍⴰ ⵖⴼ ⵉⵎⵣⴷⴰⵖ ⴰⴷ ⴰⵡⵉⵏ ⵉⵜⵏⴰⵏ ⵉ ⵓⵙⴱⵖⵙ ⵙⴳ ⵉⵙⵓⴳⴰⵎ ⵉⵍⵍⴰⵏ.
ⵙⴽⵔⵏⵜ ⵜⵙⵓⵜⵉⵡⵉⵏ ⵣⵔⵉⵏⵉⵏ ⵜⵉⵔⴳⴳⵯⵉⵏ ⵏ ⵓⵙⵙⵉⵡⴹ ⵏ ⵡⴰⵎⴰⵏ ⵖⵔ ⵜⵖⵍⵉⵡⵉⵏ, ⴰⵔ ⵜⵜⵓⵖⵣⴰⵏ ⵉⵖⴱⵓⵍⴰ ⴷ ⵓⵚⴽⵓ ⵏ ⵜⵏⵓⴹⴼⵉⵡⵉⵏ ⴷ ⵡⵓⴳⴳⵓⴳⵏ ⴷ ⵉⴳⵯⵍⵎⴰⵎⵏ ⴷ ⵓⵥⵟⵟⴰ ⵉⴳⴳⵓⵜⵏ ⵏ ⵉⵙⵓⵔⴰ ⵏ ⵜⵉⵙⵙⵉ ⵜⵜⴰⴼ ⴰⴷ ⵢⵉⵍⵉ ⵓⵏⴱⴰⴹ ⴳ ⵜⵎⵜⵜⴰ ⴰⴷ ⵉⵍⴰⵏ ⴰⵜⵉⴳ ⴷ ⵓⵙⵙⵉⵡⴹ ⵏⵏⵙ ⵖⵔ ⵉⴳⵔⴰⵏ ⵙ ⵜⵖⴰⵔⴰⵙⵜ ⴳ ⵙⵙⴱⵖⴰⵔⵏ ⵉⵎⵖⴰⵢⵏ ⴷ ⵉⵢⴰⴼⵓⵜⵏ ⵙ ⵜⵍⵖⴰ ⴷ ⵢⵓⵙⴰⵏ ⴱⵍⴰ ⵏ ⵓⵙⵅⵚⵕ ⵏⵖ ⴰⵖⵣⵣⴰ ⴳ ⵡⴰⵎⴰⵏ.
ⴱⵍⴰ ⵏ ⵓⵢⴰ ⴷ ⵏ ⵓⵇⵡⵡⵎ ⵏ ⵡⴰⵎⴰⵏ , ⵙⵔⵙⵏ ⵉⵎⵣⴷⴰⵖ, ⵙⴳ ⵣⵉⴽⴽ, ⵜⵉⵜⵉⵇⵏⵉⵢⵉⵏ ⵉⵥⵍⵉⵏ ⵉ ⵓⴱⵟⵟⵓ ⵏ ⵡⴰⵎⴰⵏ ⵏⴳⵔ ⵉⵎⴽⵔⴰⵣⵏ, ⵙ ⵓⵢⵏⵏⴰ ⵉⵎⵙⴰⵙⴰⵏ ⴰⴽⴷ ⵉⵍⴳⴰⵎⵏ ⵖⴼ ⴰⴽⴽⵯ ⵎⵙⴰⵙⴰⵏ ⵇⵇⴰⵃ ⵎⵉⴷⴷⵏ, ⴰⵢⵏⵏⴰ ⵉⵜⵜⴰⵡⵉⵏ ⵖⵔ ⵢⵉⵏⴼ ⵉ ⵉⵏⵣⴰⵖⵏ ⴷ ⵉⵎⵏⵖⴰⵏ ⵏⵏⵉ ⵉⵜⵜⵉⵍⵉⵏ ⴱⴰⵀⵔⴰ ⵖⴼ ⵓⴱⵟⵟⵓ ⵏ ⵉⵙⵓⴳⴰⵎ ⴷⵔⵓⵙⵏⵉⵏ ⵏ ⵡⴰⵎⴰⵏ.
ⴳⴳⵓⵜⵏ ⵉⵙⵡⵓⴷⴷⵓⵜⵏ ⴷ ⵜⵎⴳⴳⵉⵜⵉⵏ ⵍⵍⵉ ⵉⵜⵜⴰⵊⴰⵏ ⴰⴷ ⵢⵉⵍⵉ ⵙⵓⵏⵢⵓⴷⴷⵓ ⴷ ⵢⵓⵙⵏ ⵉ ⵓⴱⵟⵟⵓ ⵏ ⵡⴰⵎⴰⵏ ⵙ ⵉⴱⴷⴷⵉ ⵖⴼ ⵉⵎⴰⵙⵙⵏ ⵉⵥⵍⵉⵏ , ⵙⴳ ⴷⵉⴳⵙⵏ: ⵜⴰⵏⴰⵙⵜ, ⴷ ⵉⵎⵉⵙⵙ ⵢⴰⴹⵏ ⵉⵜⵜⵢⴰⵡⴰⵙⵙⴰⵏ ⵙ ⵓⵙⵇⵇⵓⵍ.
ⵜⵍⴰ ⵜⴰⵏⴰⵙⵜ ⵢⴰⵜ ⵜⵉⵍⴰⵍⵜ ⵏ ⵜⵙⵔⴰⴳⵜ ⵏ ⵡⴰⵎⴰⵏ, ⵜⴳⴰ ⵢⴰⵏ ⵓⵔⵓⴽⵓ ⵏ ⵡⴰⵏⴰⵙ ⴰⵎⵥⵥⵢⴰⵏ ⵖ ⵜⵍⵍⴰ ⵢⴰⵜ ⵜⵛⵏⴱⵉⵜ ⴳ ⵓⵣⴷⴷⴰⵔ ⵏⵏⵙ, ⵎⵉⵏⵣⵉ ⴰⵔ ⵜⵜⵡⴰⵙⴰⵔⴰⵙ ⴳ ⵢⴰⵏ ⵓⵔⵓⴽⵓ ⵏⵏⵉⴹⵏ ⴰⵅⴰⵜⴰⵔ ⵉⵜⴽⵯⴰⵔⵏ ⵙ ⵡⴰⵎⴰⵏ ⵏⵏ ⵉⴽⵛⵛⵎⵏ ⴳ ⵉⵛⵏⴱⵉ ⴰⵔ ⵜⴻⵜⴽⵓⵔ ⵜⴰⵏⴰⵙⵜ ⵜⵏⴹⵕ ⵖⵔ ⵡⴰⴷⴷⴰⵢ, ⴰⵔ ⴷ ⵜⴻⵜⵜⵢⴰⵙⴰⵢ ⵜⵜⵓⵏⵖⴰⵍ ⵜⵜⵡⴰⵙⵔⴰⵙ ⴷⴰⵖ ⵜⵉⴽⴽⵍⵜ ⵢⴰⴹⵏ ⵖ ⵉⴳⴳⵉ ⵏ ⵡⴰⵎⴰⵏ. ⴰⵔ ⵜⵜⵓⵙⵉⴹⵏⵏ ⵉⵎⵓⵔⵏ ⵏ ⵉⵎⴽⵔⴰⵣⵏ ⴳ ⵡⴰⵎⴰⵏ ⵏ ⵜⵔⴳⴳⵯⵉⵏⵏ ⴷ ⵉⵖⴱⵓⵍⴰ ⵙ ⵜⵉⵣⵉ ⵍⵍⵉ ⵉⵙⵙⵓⵜⵓⵔ ⵓⵜⴽⵓⵔ ⵏ ⵜⴰⵏⴰⵙⵜ . ⴽⵓ ⴰⵎⴽⵔⴰⵣ ⵉⵍⴰ ⵢⴰⵏ ⵡⵓⵟⵟⵓⵏ ⵉⵡⵜⵜⴰⵏ ⵙⴳ ⵜⵉⴽⴽⴰⵍ ⵏⵏⴰ ⵖ ⵉⵜⴽⴽⵓⵔ ⵓⵔⵓⴽⵓ ⴰⴷ ⵏ ⵡⴰⵏⴰⵙ.
ⵜⵍⵍⴰ ⵉⵛⵜ ⵏ ⵜⵖⴰⵔⴰⵙⵜ ⵏⵏⵉⴹⵏ ⵉⵜⵜⵓⵢⴰⵙⵙⵏ ⵙ ⵓⵙⵇⵇⵓⵍ, ⵉⵙⵏⴰⵎⴽⴰⵏ ⴳ ⵜⵓⵍⴰⵢⵜ: ⴰⵙⵇⵇⵓⵍ, ⵉⴱⴷⴷⴰ ⵖⴼ ⵓⵙⵇⵇⵓⵍ ⵏ ⵜⵙⵎⴽⵜⴰ ⵏ ⵡⴰⵎⴰⵏ ⵉⵜⵜⵓⵙⴰⵜⵎⵏ ⴳ ⵉⴳⵍⴰⵎⴰⵎⵏ ⵏⵏⴰ ⵜⵜⵎⵓⵜⵜⵓⵔⵏ ⵡⴰⵎⴰⵏ ⵏ ⵉⵙⴰⴼⴼⵏ ⴷ ⵉⵖⴱⵓⵍⴰ. ⴷⴼⴼⵔ ⵎⵉⵏ ⵜⴻⵜⵜⵓⵙⵡⵜⵜⴰ ⵜⵙⵎⴽⵜⴰ ⴰⴷ ⵙ ⵢⴰⵏ ⵓⴽⵛⵛⵉⴹ ⵏ ⵡⴰⵄⵣⵓⴼ ⵏ ⵜⴼⵔⵓⵅⵜ ⵏⵖ ⴽⵔⴰ ⵢⴰⴹⵏ, ⴰⵔ ⵉⵜⵜⵡⴰⴱⴹⵓⵏ ⵙ ⵜⴳⵎⵉⴹⵉ ⵉⵜⵜⵢⴰⵡⵙⵙⴰⵏ ⵙ ⵓⵣⵔⴼ ⵏ ⵉⵎⵙⵙⴱⵖⵔⵏ.